Scriver grond ni pign
El sursilvan vegnan ils plaids per regla screts cun in bustab pign (minuscla).
amitg, clav, seser, bi, adina
Cun in bustab grond (maiuscla) scrivan ins ...
• all'entschatta d'ina construcziun, suenter in punct ed era suenter in'enzenna da damonda ni in'enzenna d'exclamaziun.
Quei ei miu frar. El ha num Marcus.
Has capiu quella damonda? Gie.
• suenter in punct dubel avon ina construcziun ch'introducescha il discuors direct.
Jana damonda: «Nua ei la scola?»
• ils nums propris da persunas, animals, marcas e firmas.
Gion, Maria, Lupo
• ils nums geografics.
Lumnezia, Breil, Milaun, la Frontscha, il Rein
• ils nums da pievels.
ils Romontschs, ils Svizzers, ils Americans, ils Gedius, ils Indians
• ils nums da fiastas (religiusas) e da divinitads.
Nadal, Tschuncheismas, il Tutpussent, il Segner, Zeus
• ils pronoms persunals ella fuorma da curtesia.
Astgel jeu supplicar Vus da prender plaz?
Cordial engraziament per Vies resun.
Pils nums cumponi dat ei las suandontas reglas:
• En nums cumponi geografics vegnan tut ils plaids screts grond auter ch'ils artechels e las preposiziuns.
Péz Mundaun, Via Alpsu, Alp Dado, Via dalla Staziun, Lag la Cauma, Mar Mediterrana, Stadis Uni dall'America
• Tier ils auters nums cumponi cun adjectivs scrivan ins denton pign igl adjectiv, sche quel ei plazzaus davos il nomen.
la Biblioteca populara, il Cussegl grond, il Cussegl naziunal
Adatg:
Certas firmas ed organisaziuns che drovan era ina scursaniziun scrivan tut las parts da lur nums ufficials cun in bustab grond.
Banca Cantunala Grischuna (BCG)
Parc Naziunal Svizzer (PNS)
Radiotelevisiun Svizra Rumantscha (RTR)
Lia Rumantscha (LR)