Il plural collectiv
Entgins nomens han sper la fuorma dil plural cun -s ina fuorma dil plural culla finiziun -a. Quella numnan ins il plural collectiv. Ils plaids cun quella finiziun expriman ina quantitad nundeterminada (buca definida). Quei vul dir ch'ins enconuscha buc il diember exact.
Jeu hai in meil.
Ti astgas prender dus meils.
Culla meila digl agen curtgin fa la mumma ina petta. (plural collectiv)
Auters plurals collectivs frequents:
il pér – la péra
il bratsch – la bratscha
il lenn – la lenna
il rom – la roma
Plurals collectivs cun midadas ortograficas:
igl ies – l'ossa
il gnierv – la gnarva
il crap – la crappa
il det – la detta
Autras fuormas collectivas vegnan tractadas el capetel 'Ils suffixs'.
Suenter il plural collectiv stat il verb el singular.
La detta ei marvla dil freid.
La crappa ei rodunda.
La roma ei pinada.
Attenziun:
In pèr nomens existan mo sco collectivs, p.ex. la glieud, la buobanaglia.
La glieud ei cuntenta.
La buobanaglia fa canera.